" سر العمر الطويل "
بقلم/ وجدان اغا
ناس كتير بتفتكر إن طول العمر ليه وصفة سحرية ، جينات قوية، أكل صحي، رياضة ، فيتامينات…
بس الحقيقة إن في عامل أخطر وأهم بكتير، وغالبًا احنا بننساه :
" التوتر المزمن " …
ممكن إنسان يموت وهو في عز شابه …. ولما نيجي نبص لحياته نلاقيه كان عايش تحت ضغط طول الوقت ..
التوتر المستمر مش مجرد إحساس نفسي، ده حالة جسدية كاملة… لان الجسم بيقعد 24 ساعة في وضع “ الاستعداد ”، ودا بيخلي هرمون الكورتيزول يعلى.. طيب والنتيجة؟
تدمير للأوعية الدموية، ضعف في المناعة، إرهاق للدماغ،
وشيخوخة مبكرة … مبكرة قوي…
العجيب بقى إننا بنلاقي المعمّرين، في أغلب الدراسات، مش شرط يكونوا نباتيين ، ولا بيتمرنوا كل يوم، ولا ما بيلخبطوش في الأكل…. لكن المشترك بينهم حاجة واحدة :
"عايشين في سلام مع نفسهم."
مش عايشين طول الوقت دماغهم شغالة وبيسألوا نفسهم “أنا المفروض أبقى إيه؟” …. “لسه ناقصني إيه؟” … “ليه فلان احسن مني ؟” … " ليه مش عايش عيشة فلان ؟ " …
الأسئلة دي بتخلق فراغ داخلي، والفراغ ده بيتحول لتوتر…
والتوتر بنقص العمر…
خلّينا نبقى صُرحا:
لو بتكره شغلك ورايح له كل يوم غصب …فده ممكن يقصرمن عمرك سنين…. لو عايش مع شخص مش بتحبه… سنين تانية بتروح… لو حواليك ناس بتستنزف طاقتك، تحبطك، وتقلل منك، ده مش ضغط نفسي وبس… ده عمر بيتسرق منك ….
المعمّرون ما كانواش بيجلدوا نفسهم ولا يحطوها تحت ضغط ..
كانوا يناموا لما يحسّوا بالنوم .. وبردو بكل بساطة ياكلوا لما يجوعوا… يستريحوا لما يتعبوا…. حياة بسيطة بكل ما تحمله من معني …
إحنا بقى بنعمل ايه ؟ بنتجاهل إشارات الجسم ، نكمّل رغم التعب،
نأجل الراحة … لحد ما الجسم ينهار… وساعتها حتى الإشارات نفسها بتختفي …
علشان كده، طول العمر مش محتاج “هوس تحسين الصحة" وكتر اقراص الفيتامينات ولا اي تعقيد…. محتاج بس نرجع للحاجات البسيطة والطبيعية …
نسمع لجسمنا ، نخفّ المقاومة الداخلية ، ونعيش الحياة اللي نفسنا فيها ونحقق الجملة اللي كنا دايما بنقولها لنفسنا :
“هعيشها لما أرتاح… لما أتقاعد… لما الظروف تتحسن”.
لاء … "عيشها دلوقتي " … عيشها قبل ما الوقت يتسرق منك وما تحسش بجماله …
العمر الطويل مش بعدد السنين … لكن بعدد اللحظات اللي عشتها وانت في سلام…
سامح نفسك ، وابعد عن كل اللي يوجع روحك ويتعبك ، وعيش اللحظات اللي تطمّنك من جوه.
هو دا السبب الحقيقي اللي هيخلي عمرك طويل…
وجدان اغا